NEET UG 2026 Re-Exam Today: Over 22 Lakh Students, IAF Security
ਨਵੀਂ ਦਿੱਲੀ: NEET UG 2026 Re-Exam: ਪੇਪਰ ਲੀਕ ਦੇ ਵਿਵਾਦਾਂ ਤੋਂ ਬਾਅਦ ਅੱਜ ਦੇਸ਼ ਦੇ 564 ਸ਼ਹਿਰਾਂ ਵਿੱਚ NEET-UG 2026 ਦੀ ਪ੍ਰੀਖਿਆ ਦੁਬਾਰਾ ਕਰਵਾਈ ਜਾ ਰਹੀ ਹੈ। ਇਸ ਇਤਿਹਾਸਕ ਰੀ-ਐਗਜ਼ਾਮ (ਦੁਬਾਰਾ ਪ੍ਰੀਖਿਆ) ਵਿੱਚ ਦੇਸ਼ ਅਤੇ ਵਿਦੇਸ਼ ਦੇ ਕੇਂਦਰਾਂ ਨੂੰ ਮਿਲਾ ਕੇ ਕੁੱਲ 22.79 ਲੱਖ ਤੋਂ ਵੱਧ ਵਿਦਿਆਰਥੀ ਬੈਠ ਰਹੇ ਹਨ। ਸੁਰੱਖਿਆ ਅਤੇ ਨਿਰਪੱਖਤਾ ਯਕੀਨੀ ਬਣਾਉਣ ਲਈ ਇਸ ਵਾਰ ਸੁਰੱਖਿਆ ਪ੍ਰਬੰਧਾਂ ਵਿੱਚ ਬੇਮਿਸਾਲ ਬਦਲਾਅ ਕੀਤੇ ਗਏ ਹਨ।
ਨੈਸ਼ਨਲ ਟੈਸਟਿੰਗ ਏਜੰਸੀ (NTA) ਨੇ ਪ੍ਰਸ਼ਨ ਪੱਤਰਾਂ ਦੀ ਸੁਰੱਖਿਆ ਲਈ ਪਹਿਲੀ ਵਾਰ ਭਾਰਤੀ ਵਾਯੂ ਸੈਨਾ (ਏਅਰ ਫੋਰਸ) ਦੀ ਮਦਦ ਲਈ ਹੈ। ਏਅਰ ਫੋਰਸ ਦੇ ਹੈਲੀਕਾਪਟਰਾਂ ਅਤੇ ਜਹਾਜ਼ਾਂ ਨੇ 200 ਤੋਂ ਵੱਧ ਉਡਾਣਾਂ ਭਰ ਕੇ ਪੇਪਰ ਦੇਸ਼ ਦੇ ਵੱਖ-ਵੱਖ ਸਟ੍ਰੌਂਗ ਰੂਮਾਂ ਅਤੇ ਸੈਂਟਰਾਂ ਤੱਕ ਸੁਰੱਖਿਅਤ ਪਹੁੰਚਾਏ ਹਨ। ਪੂਰੇ ਦੇਸ਼ ਵਿੱਚ 2 ਲੱਖ ਤੋਂ ਵੱਧ ਸੁਰੱਖਿਆ ਅਤੇ ਪ੍ਰੀਖਿਆ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ।
ਇਹ ਪ੍ਰੀਖਿਆ ਅੰਗਰੇਜ਼ੀ, ਹਿੰਦੀ ਸਮੇਤ 12 ਭਾਰਤੀ ਭਾਸ਼ਾਵਾਂ ਵਿੱਚ ਕਰਵਾਈ ਜਾਵੇਗੀ। ਇਸ ਪੂਰੇ ਆਯੋਜਨ ਵਿੱਚ ਤਿੰਨ ਲੱਖ ਤੋਂ ਵੱਧ ਕਰਮਚਾਰੀਆਂ ਅਤੇ ਅਧਿਕਾਰੀਆਂ ਨੂੰ ਲਗਾਇਆ ਗਿਆ ਹੈ।
ਐਨਟੀਏ ਨੇ ਵਿਦਿਆਰਥੀਆਂ ਨੂੰ ਐਡਮਿਟ ਕਾਰਡ (ਪ੍ਰਵੇਸ਼ ਪੱਤਰ), ਇੱਕ ਪਛਾਣ ਪੱਤਰ ਅਤੇ ਦੋ ਫੋਟੋਆਂ ਦੇ ਨਾਲ ਨਿਰਧਾਰਤ ਸਮੇਂ 'ਤੇ ਪ੍ਰੀਖਿਆ ਕੇਂਦਰਾਂ 'ਤੇ ਪਹੁੰਚਣ ਲਈ ਕਿਹਾ ਹੈ। ਗਰਮੀ ਨੂੰ ਦੇਖਦੇ ਹੋਏ ਪ੍ਰੀਖਿਆ ਕੇਂਦਰਾਂ 'ਤੇ ਪੀਣ ਵਾਲੇ ਪਾਣੀ, ਬਿਜਲੀ, ਪੱਖੇ ਅਤੇ ਮਾਪਿਆਂ ਦੇ ਬਾਹਰ ਬੈਠਣ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ।
ਐਨਟੀਏ ਨੇ ਦੁਬਾਰਾ ਹੋਣ ਵਾਲੀ ਇਸ ਪ੍ਰੀਖਿਆ ਨੂੰ ਲੈ ਕੇ ਕਾਫੀ ਸਾਵਧਾਨੀਆਂ ਵਰਤੀਆਂ ਹਨ। ਪ੍ਰਸ਼ਨ ਪੱਤਰ ਤਿਆਰ ਕਰਨ ਵਾਲੀ ਮਾਹਿਰ ਟੀਮ ਨੂੰ ਪ੍ਰੀਖਿਆ ਹੋਣ ਤੱਕ ਕਵਾਰੰਟੀਨ ਵਿੱਚ ਰੱਖਿਆ ਗਿਆ ਹੈ।
ਪ੍ਰਸ਼ਨ ਪੱਤਰਾਂ ਨੂੰ ਐਨਟੀਏ ਦੇ 18 ਰੀਜਨਲ ਸੈਂਟਰਾਂ ਤੱਕ ਭਾਰਤੀ ਵਾਯੂ ਸੈਨਾ ਦੇ ਜਹਾਜ਼ਾਂ ਅਤੇ ਡਾਕ ਵਿਭਾਗ ਦੀ ਮਦਦ ਨਾਲ ਪਹੁੰਚਾਇਆ ਗਿਆ ਹੈ। ਪ੍ਰੀਖਿਆ ਕੇਂਦਰਾਂ 'ਤੇ ਸਥਾਨਕ ਪੁਲਿਸ ਦੇ ਨਾਲ ਕੇਂਦਰੀ ਬਲਾਂ ਦੀ ਵੀ ਤਾਇਨਾਤੀ ਕੀਤੀ ਗਈ ਹੈ।
ਜ਼ਿਲ੍ਹਿਆਂ ਦੇ ਡੀਐਮ (DM) ਅਤੇ ਐਸਪੀ (SP) ਨੂੰ ਪ੍ਰੀਖਿਆ ਕੇਂਦਰਾਂ 'ਤੇ ਵਿਸ਼ੇਸ਼ ਤੌਰ 'ਤੇ ਮੌਜੂਦ ਰਹਿਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਕਿਸੇ ਵੀ ਤਰ੍ਹਾਂ ਦੇ ਕੂੜ ਪ੍ਰਚਾਰ (ਅਫ਼ਵਾਹਾਂ) ਅਤੇ ਗੜਬੜੀਆਂ ਨਾਲ ਨਜਿੱਠਣ ਲਈ ਸਾਈਬਰ ਕਮਾਂਡੋ ਵੀ ਤਾਇਨਾਤ ਕੀਤੇ ਜਾ ਰਹੇ ਹਨ।
ਐਨਟੀਏ ਨੇ ਮੌਕ ਡਰਿੱਲ ਵਿੱਚ ਤਿਆਰੀਆਂ ਦੇ ਪੁਖਤਾ ਹੋਣ ਦਾ ਦਾਅਵਾ ਕਰਦਿਆਂ ਕਿਹਾ ਕਿ ਇਹ ਪ੍ਰੀਖਿਆ 95 ਹਜ਼ਾਰ ਤੋਂ ਵੱਧ ਕਮਰਿਆਂ ਵਿੱਚ ਹੋਵੇਗੀ। ਹਰ ਕਮਰੇ ਵਿੱਚ ਘੱਟੋ-ਘੱਟ ਇੱਕ ਸੀਸੀਟੀਵੀ (CCTV) ਲੱਗਿਆ ਹੋਵੇਗਾ। ਕੁੱਲ 1.38 ਲੱਖ ਤੋਂ ਵੱਧ ਸੀਸੀਟੀਵੀ ਕੈਮਰੇ ਲਗਾਏ ਗਏ ਹਨ। ਇਨ੍ਹਾਂ ਦੀ ਫੀਡਿੰਗ ਨੂੰ ਰਾਸ਼ਟਰੀ, ਰਾਜ ਅਤੇ ਮੰਤਰਾਲਾ ਪੱਧਰ 'ਤੇ ਵਰਚੁਅਲੀ ਮਾਨੀਟਰ (ਨਿਗਰਾਨੀ) ਕੀਤਾ ਜਾਵੇਗਾ।
ਐਨਟੀਏ ਨੇ ਇਸ ਵਾਰ ਪ੍ਰੀਖਿਆ ਦੇ ਸਮੇਂ ਨੂੰ 15 ਮਿੰਟ ਵਧਾਇਆ ਹੈ। ਪ੍ਰੀਖਿਆ ਕੁੱਲ ਤਿੰਨ ਘੰਟੇ 15 ਮਿੰਟ ਦੀ ਹੋਵੇਗੀ। ਪ੍ਰੀਖਿਆ ਦੁਪਹਿਰ ਦੋ ਵਜੇ ਤੋਂ ਸ਼ਾਮ 5.15 ਵਜੇ ਤੱਕ ਕਰਵਾਈ ਜਾਵੇਗੀ।
ਪ੍ਰੀਖਿਆ ਕੇਂਦਰਾਂ 'ਤੇ ਵਿਦਿਆਰਥੀਆਂ ਨੂੰ ਸਵੇਰੇ 11 ਵਜੇ ਤੋਂ ਦੁਪਹਿਰ 1.30 ਵਜੇ ਤੱਕ ਪ੍ਰਵੇਸ਼ ਦਿੱਤਾ ਜਾਵੇਗਾ। 1.30 ਵਜੇ ਤੋਂ ਬਾਅਦ ਪ੍ਰੀਖਿਆ ਕੇਂਦਰ ਦਾ ਗੇਟ ਬੰਦ ਹੋ ਜਾਵੇਗਾ। ਇਸ ਤੋਂ ਬਾਅਦ ਕਿਸੇ ਵੀ ਸਥਿਤੀ ਵਿੱਚ ਐਂਟਰੀ ਨਹੀਂ ਦਿੱਤੀ ਜਾਵੇਗੀ।
ਵਿਦਿਆਰਥੀ ਆਪਣੇ ਨਾਲ ਕੀ ਲੈ ਕੇ ਆਉਣ? ਐਨਟੀਏ ਨੇ ਹਰੇਕ ਵਿਦਿਆਰਥੀ ਨੂੰ ਤਿੰਨ ਚੀਜ਼ਾਂ ਲਾਜ਼ਮੀ ਤੌਰ 'ਤੇ ਲਿਆਉਣ ਲਈ ਕਿਹਾ ਹੈ:
ਐਨਟੀਏ ਦੀ ਅਧਿਕਾਰਤ ਵੈੱਬਸਾਈਟ ਤੋਂ ਡਾਊਨਲੋਡ ਕੀਤਾ ਹੋਇਆ ਐਡਮਿਟ ਕਾਰਡ (ਪ੍ਰਵੇਸ਼ ਪੱਤਰ)।
ਕੋਈ ਵੀ ਫੋਟੋ ਵਾਲਾ ਪਛਾਣ ਪੱਤਰ, ਜਿਸ ਵਿੱਚ ਆਧਾਰ ਕਾਰਡ, ਪੈਨ ਕਾਰਡ ਜਾਂ ਵੋਟਰ ਆਈਡੀ ਆਦਿ ਹੋ ਸਕਦੇ ਹਨ।
ਨਾਲ ਹੀ ਦੋ ਪਾਸਪੋਰਟ ਸਾਈਜ਼ ਫੋਟੋਆਂ ਵੀ ਲੈ ਕੇ ਆਉਣ ਲਈ ਕਿਹਾ ਗਿਆ ਹੈ।
ਐਨਟੀਏ ਨੇ ਵਿਦਿਆਰਥੀਆਂ ਨੂੰ ਹਲਕੇ ਰੰਗ ਦੀ ਅੱਧੀ ਬਾਂਹ ਦੀ ਸ਼ਰਟ ਜਾਂ ਟੀ-ਸ਼ਰਟ ਅਤੇ ਸਾਧਾਰਨ ਪੈਂਟ ਜਾਂ ਟਰਾਊਜ਼ਰ ਪਹਿਨ ਕੇ ਆਉਣ ਦੀ ਸਲਾਹ ਦਿੱਤੀ ਹੈ। ਪੈਰਾਂ ਵਿੱਚ ਸਿਰਫ਼ ਸਾਧਾਰਨ ਅਤੇ ਘੱਟ ਹੀਲ ਵਾਲੀਆਂ ਚੱਪਲਾਂ ਜਾਂ ਸੈਂਡਲ ਪਹਿਨ ਕੇ ਆਉਣ ਲਈ ਕਿਹਾ ਗਿਆ ਹੈ।
